Avropa Şurasınıñ Nazirler komiteti toplaşuvında Ukraina eyyeti fevral 1-de Qırımda qırımtatarlarnıñ advokatlarına basqı yapılğanını aydınlatıp, bunı «Rusiye işğalci memuriyetiniñ muntazam repressiya siyasetiniñ yañı alâmeti» olaraq tanıttı. Bunı Ukraina Tışqı işler nazirliginiñ matbuat hızmeti fevral 2-de bildire.
Ukraina qayd ete ki, Rusiye Qırımda söz serbestligini bastırıp, jurnalistlerniñ havfsızlığı içün er daim telüke çıqara.
Ukraina kütleviy haber institutınıñ malümatlarına esaslanıp qayd etilgenine köre, Qırımda ifade serbestligine, şu cümleden kütleviy haber vastaları ve jurnalistlerge yapılğan basqı 300 kereden ziyade qayd etildi.
«Ukraina eyyeti Rusiyeni advokat Nikolay Polozovğa basqı yapmamağa, advokat Emil Kürbedinov, jurnalist Nikolay Semena ve Rusiye işğalini tanımağan, insan aqlarını qorçalağan ve jurnalist faaliyetinen oğraşqan diger insanlarnıñ qabaatını lâğu etmege ve olarnı azat etmege mecbur etmek içün Avropa Şurasını tedbir almağa çağırdı», – dep aytıla haberde.
Bundan ğayrı, Rusiye Qırımda mustaqil kütleviy haber vastalarınıñ işini bloktan çıqarmaq, şu cümleden «Tarihiy kerçek» neşiriniñ saytını açmaq kerek, dep aytıla.
Advokat Emil Kürbedinov yanvar 26 künü Bağçasarayda Rusiyeniñ silâlı hızmetleri tarafından yaqalandı. O qırımtatar faali Seyran Saliyevniñ evine, adliyeviy yardım bermek içün kete edi. Aqmescitniñ Demiryol rayon mahkemesi advokat Emil Kürbedinovnı Memuriy qanun bozuvları Kodeksiniñ 20.3 maddesi (Natsist timsalleriniñ teşviqatı ve açıq numayışı) boyunca qabaatlı olaraq tanıdı ve 10 künge apis etti.
Kürbedinov siyasiy davalarnı baqqan eñ eyi Qırım advokatlarından biridir. O ve zenaatdaşları apiske alınmasını advokat faaliyetine keder etmek ıntıluvı olaraq tanıylar.
Baarde Qırımda Qırım.Aqiqat ile işbirliginde şeklengen jurnalistlerniñ evlerinde tintüvler olıp keçti. Radio Svoboda müellifi Nikolay Semenağa qarşı Rusiye Federatsiyasınıñ topraq bütünligini bozmaq çağıruvları şeklenmesi ile cinaiy iş açıldı. Rusiye taqiqatı oña yarımadanı terk etmege yasaq etti.
Nikolay Semenanıñ imayesi, Halqara ve Avropa Jurnalistler Federatsiyası, em de Söz serbestligi boyunca OSCE temsilcisiniñ ofisi, Rusiye Federal telükesizlik hızmetini – jurnalistni, tedaviylenmesi içün, Qırımdan yibermege çağırdı, şimdige qadar musbet cevap daa alınmadı.
