Link açıqlığı

Qırımdaki mahkeme «Hizb ut-Tahrir davasınıñ» eki mabusınıñ apis müddetini uzattı


Edem Semedlâyev

İşğal etilgen Qırımda mahkeme qabaat muracaatını qanaatlendirip, «Hizb ut-Tahrir davasınıñ» eki mabusı Arsen Cepparov ve Refat Alimovnıñ apiste yatma müddetlerini 2 ayğa qadar uzattı. Bunı advokat Edem Semedlâyev video muracaatında bildirdi.

«Apis müddetleri eki ayğa qadar uzatıldı, 2017 senesi aprel 8 kününe qadar. Esnas devamında olarnı qafeste tuttılar. Qafesten çıqarılsın dep rica etti, amma mahkemeci red etti», – dep ayttı Semedlâyev.

Onıñ bildirgenine köre, imaye bu qarardan şikâyet etecek ola.

İşğal etilgen Aqmescitniñ Kiyev rayon mahkemesi Cepparov ve Alimovnıñ apis müddetlerini eki ayğa – fevral 8-ne qadar, İsmailovnıñ – 2017 senesi mart 11-ne qadar uzatqan edi.

Qızıltaş qasabasınıñ sakinleri Refat Alimov ve Arsen Cepparov 2016 senesi aprel ayında «Hizb ut-Tahrir» ile alâqaları olğanında şeklenip yaqalanğan edi.

Rustem İsmailov ve daa beş qırımtatarı Qırımda oktâbr 12-de yaqalandı. Olarnı da «Hizb ut-Tahrir» islâm siyasiy teşkilâtında iştirak etmesi ile qabaatlaylar.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG