Rusiyeniñ Qara deñiz flotunıñ ştabı An-26 ukrain uçağına ateş açılğanına dair qabaatlarnı inkâr ete. Ştab qayd ete ki, uçaq Qara deñizdeki teşme direkleri üzerinden «eki provokatsion uçuşnı» kerçekleştirdi, dep haber ete Rusiye haber vastaları.
«Ukraina tarafınıñ An-26 uçağına ateş açılğanına dair malümatları – tam bir yalandır. Ukrainağa ait An-26 ekinci kere kirgende direkke urulmasın dep, teşme platforması qoruma bölüginiñ hadimi «işaret» pıştavından 4 ışıq signalını berdi», – dep tekrarlay Rusiye Qara deñiz flotu hadiminiñ aytqanlarını TASS agentligi.
Rusiyeniñ «İnterfaks» neşiri Rusiye Qara deñiz flotunıñ vekili bergen malümatqa esaslana. O, «vaqia çarşenbe künü saat 11:30 ve 12:00 arası, 53 nomeralı ukrain arbiy-naqliye uçağı Rusiye teşme direkleri yanında provokatsiya yapqan soñ olğanını» bildire.
Fevral 1 künü Ukraina Mudafaa naziri Stepan Poltorak Qara deñiz üzerinde Ukraina Arbiy quvetleriniñ naqliy uçağına ateş açıldı, dep haber etti.
Onıñ sözlerine köre, Ukrainanıñ (deñiz) iqtisadiy alanında idman uçuşı ötkerilgende Odesa gaz yataqları yanında evel Rusiye tarafından zapt etilgen burğu qullelerinden atış silâsı ile Ukraina Arbiy quvetleri Deñiz silâlı quvetleriniñ An-26 naqliy uçağına ateş açıldı.
Bildirüvde böyle aytıla: «Atış neticesinde uçaq zarar kördi. Uçaqnıñ erkânı zarar körmedi, An-26 uçuş vazifesini devam etti».
