Link açıqlığı

Çarşenbe künü, fevral 1-de, Alupkadaki hatıra müzeyinde uçucı Amet-Han Sultan añıldı. Tedbir uçucınıñ ölüminden 46 yıl keçkeni munasebetinen keçirildi, dep bildire Kreml kontrol etken Alupka memuriyetiniñ matbuat hızmeti.

Alupkanıñ №1 mektebiniñ ocaları ve talebeleri, yerli veteran, müzey hadimleri, Dagestan cemiyetiniñ vekilleri, qırımtatar milliy areketiniñ iştirakçileri ve Kreml kontrol etken Qırım deputatları ve memurları uçucını añmağa keldiler.

«Yapqan areketleri ve işinen yıllarğa, on yıllarğa ve atta asırlarğa insan hatırasını qaldırğan insannı añamız. Mence, bu insannıñ areketleri ve onıñ hatırası er bir qırımlınıñ yüreginde yaşap, Amet-Han kibi qaramanlar bizge yaşağan kelecegimizni bergenini hatırlatmaq kerek», – dep ayttı Yalta şeer şurasınıñ deputatı Albert Kurşutov.

Amet-Han Sultan 20 oktâbr 1920 künü Alupkada dünyağa keldi. Babası – lak milletinden (Dağıstandaki Tsovkra-1 avulından doğma), anası – qırımtatarı. Ana-babası tarafından Amet-Han Sultannı qırımtatarları da, Dağıstanlılar da öz milliy qaraman olaraq qabul eteler. Amet-Han Sultan 603 cenkâver uçuş yaptı, şahsen özü 30 ve grupp erkanında 19 lüftvaffeniñ uçağını urdı. Uçuş vaqtında uçucı tahminen 100 uçaqnıñ çeşitini ögrendi, uçuşları ise 4237 saatni teşkil ete eken. 1971 senesi fevral 1-de Tu-16 uçma laboratoriyasında deñeme uçuşında elâk oldı. Moskva Novodeviçye mezarlığında defn etildi. Dağıstannıñ paytahtı Mahaçkala şeerinde halqara avalimanına onıñ adı berilgen.

XS
SM
MD
LG