Link açıqlığı

Lomonosov Moskva devlet universitetiniñ studentleri Keriç köprüsiniñ qurucılığınen oğraşacaq, dep bildire Rosavtodornıñ matbuat hızmeti.

Rosavtodor reberi Roman Starovoyt studentlerni yazda işke yollamağa teklif etti. Onıñ aytqanına köre, Keriç köprüsiniñ qurucılıq tecribesi bu saanıñ kelecek mütehassısları içün faydalı olur.

«Keriç köprüsiniñ quruclığında çalışqan saanıñ eñ eyi mütehassıslarından menimsegen ameliy alışqanlıqlar saanıñ kelecek mütehassısları içün qıymetli bir tecribe ola», – dep tüşüne Rosavtodor yolbaşçısı.

Matbuat hızmeti bildire ki, köpür qurucıları erkânına oquşta alâ baalar alğan ve aliy oquv yurtunıñ cemaat faaliyetinde iştirak etken talapkâr studentler kirecek. Olarn aftada 5 kün, künde 8 saat iş bekleydir.

Keriç boğazında köpür qurucılığı aqqında Rusiye prezidenti Vladimir Putin Qırım işğalinden soñ birden ilân etti. Köpürni 2018 senesine qadar qurmağa, 2019 senesi yazda ise çalıştırmağa vade ettiler.

İyül başında «Krımskiy most» haber merkezi Keriç boğazındaki Rusiyeden Qırımğa köpür qurucılığınıñ fiyatı 227,92 mlrd ruble teşkil etkenini bildirgen edi.

Bundan evel Rusiye ükümeti Keriç boğazındaki köpürniñ demir yol qısmınıñ vaqtınca açılmasını bir yılğa qaldırdı – 2018 senesi dekabr ayından 2019 senesi dekabr ayına.

Ukraina tarafı 2014 senesi Qırım işğalinden soñ Rusiye ile köpür qurucılığı añlaşmasından ayırıldı.

XS
SM
MD
LG