Ukrain ombudsmeni Valeriya Lutkovskayanıñ ofisi yaqın vaqıtta 16 mabusnıñ işğal etilgen Qırımdan esas Ukrainağa avuştırılacağına ümüt ete. Bunı fevral 1-de Ukraina Yuqarı Radasınıñ insan aqlarından vekâletlisiniñ vekili Mihail Çaplıga Qırım.Aqiqatqa ayttı.
«Ümüt etemiz ki, bu (bazı mabuslarnıñ Qırımdan esas Ukrainağa avuştırılması – QA) eñ yaqın vaqıtta olur, çünki añlaşmalar oldı ve belli bir tedbirler yapıldı. Añlaymız, Tatyana Nikolayevna (Rusiye ombudsmeni Tatyana Moskalkova – QA) öz akimiyetiniñ organlarınen bağ tuta. Ümüt etemiz ki, tizilgen añlaşmalar amelge de keçirilir», – dep ayttı Çaplıga.
Fevral 1-de internet konferentsiyası vaqtında Ukraina ombudsmeni Valeriya Lutkovskaya «2014 senesi mart ayından evel Qırımda apiste yatqan mabuslar istegini bildirip, Herson ve Nikolayev apishanelerine avuştırılmaq kerek edi», dep bildirdi. Amma bugünki künde bu añlaşma şimdilik yerine ketirilmedi».
Ukraina Yuqarı Radasınıñ insan aqlarından vekâletlisi Valeriya Lutkovskaya 2016 senesi dekabr 26-da işğal etilgen Qırımğa barıp, 42 ukrain siyasiy mabusından üçüni ziyaret etti. Ombudsmen «fevral 26 davasınıñ» üç mabusı – Ahtem Çiygoz, Ali Asanov ve Mustafa Degermenci ile körüşti.
