Link açıqlığı

Tamırlarında qırımtatarı olğan ukrain yırcısı Jamala, Halqara Köz Teşkilâtı (International Organization for Migration) ile işbirlik qurmağa niyetli. Bunı onıñ PR-idarecisi Denis Kozlovskiy fevral 1 künü Kyivde ötkerilgen matbuat konferentsiyasında haber etti, dep bildire Qırım.Aqiqat muhbiri.

Kozlovskiy: «Bizler şimdi BM Köç Teşkilâtı ile muzakerelerimizni alıp baramız, olar Jamalanı işbirlikke celp etmege niyetliler. O üç yıl evelsi eyi niyet elçisi olaraq olarnıñ azırlağan vesiqalı filimlerinde endi iştirak etken edi, o vaqıtnıñ mevzusı – insan ticareti edi. Şimdi bu leyhanıñ nevbetteki basamağı azırlanıla», – dep ayttı.

Matbuat konferentsiyası devamında Jamala, Kyivde mayıs 12 künü Sport Sarayında «I Believe in U» adlı yañı programma ile kontsert ötkerilecegini ilân etti.

Jamala «Eurovision-2016» yır yarışınıñ ğalibi oldı, yarış finalı İsveçiyanıñ paytahtı Stockholmde mayıs 15 gecesi olıp keçti. Qırımlı qırımtatar sürgünligini añlatqan «1944» yırı ile çıqışta bulunğan edi. Yarış qaidelerine köre, 2017 senesi yarışnı Ukraina qabul etecek. «Eurovision-2017» Kyivde keçirilecektir.

2016 senesi dekabr ayında Jamala, Halqara Köç Teşkilâtınıñ insan aqlarınıñ qorçalaması boyunca BM kampaniyasına qoşulğan edi. Yırcı, video-levhada iştirak etip, ukrainlilerni mustaqil olmağa ve öz aqlarını qorumağa çağırdı.

XS
SM
MD
LG