Ukraina Nazieler Şurası, kendisine Qırım Muhtar Cumhuriyetiniñ devlet organları tarafından tesis etilgen memuriy müessiselerni yoq etmek aqqını bergen qanun leyhasını destekledi.
Bu aqta qarar fevral 1, çarşenbe künü Ukraina Nazirler Şurasınıñ toplaşuvında qabul etildi, dep haber ete «İnterfaks-Ukraina».
Mezkün qanun leyhası «ukrain akimiyetine, Qırım memuriyeti tarafından teşkil etilgen organlarınıñ kereksizligi sebebinden olarnıñ faaliyetini toqtatmaq aqqı berilgeni» aqqında bildirile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
