Fevral 1 künü Qara deñiz üzerinde Ukraina Arbiy quvetleriniñ naqliy uçağına ateş açtılar. Bunı öz Facebook saifesinde Ukraina Mudafaa naziri Stepan Poltorak haber etti.
Onıñ sözlerine köre, Ukrainanıñ (deñiz) iqtisadiy alanında idman uçuşı ötkerilgende Odesa gaz yataqları yanında evel Rusiye tarafından zapt etilgen burğu qullelerinden atış silâsı ile Ukraina Arbiy quvetleri Deñiz silâlı quvetleriniñ An-26 naqliy uçağına ateş açıldı.
Bildirüvde böyle aytıla: «Atış neticesinde uçaq zarar kördi. Uçaqnıñ erkânı zarar körmedi, An-26 uçuş vazifesini devam etti».
Bundan da ğayrı, Stepan Poltorak bildirdi ki, erkân, Rusiyeniñ radarları aktif çalışanlarını körüp qayd etti. Çoqusı allarda bu – ava mudafaa sistemalarınıñ raketalarını idare etmek içün qullanıla.
Ukraina Mudafaa naziriniñ yazısında: «Uçaq aerodromğa qonğan soñ tıştan baqılğanda, qurşundan qalğan 3 santimetrlik teşik tapıldı – uçaqqa atış silâsından ateş açılğanınıñ aqibeti», – dep bildirile.
Rusiye Mudafaa nazirligi tarafından bu adise aqqında resmiy açıqlamalar şimdige qadar daa yoq.
