Link açıqlığı

Yanvar 31 künü Qırımtatar Milliy Meclis reisiniñ muavini Ahtem Çiygoznıñ işi boyunca mahkeme oturışında şaat olaraq sorğudan keçken Qırımnıñ Rusiye yolbaşçısı Sergey Aksönov, 2014 senesi yarımadada «samooborona» teşkilâtçısı olğanını boynuna aldı. Bunı advokat Nikolay Polozov bildirdi.

Polozov: «Toplaşuvnıñ birinci yarısında Sergey Aksönov, kerçekten, «narodnoye opolçeniye» bölükleriniñ teşkilâtçısı olğanını itiraf etti. O, bu paramiliter zümre resmiy olmağanını qabul etti. Aksönov dedi ki, Kyivde yüz bergen vaqialarda (Menlik İnqilâbı vaqıtında – QA) Qırımdan bir-qaç militsiya hadimi elâk olğan edi, ve, onıñ fikirine köre, bu onıñ mında yapqan areketlerini aqlay», – dep bildirdi.

Ukraina Baş prokuraturasınıñ matbuat hızmetinde, Polozovnıñ beyanatını Qırım.Aqiqat içün izaatlap, dediler ki, «resmiy noqta-i nazarnı, Qırım porokurorı (Ukraina Baş prokuraturasınıñ Qırım MC prokuraturası – QA) tarafından bu meselede fikir bildirilgen soñaçıqlap olurlar».

Ukraina Baş prokuraturasınıñ matbuat kâtibi Larisa Sargan, Qırım.Aqiqatqa: «Zanımca, pek tez seslenirler. Bütün hainlerni bizler eñ azından ğıyabiy olaraq iliştirmege tırışamız. Şunıñ içün, bese-belli, bu insan (Sergey Aksönov – QA) da bizim cedvelimige oğraycaq», – dep ayttı.

Rusiye tarafından tain etilgen Qırım yolbaşçısı Sergey Aksönov, yanvar 31, salı künü saba Qırımtatar Milliy Meclis reisiniñ muavini Ahtem Çiyğoznıñ işinde şaat olaraq Kreml nezaretindeki Qırım Yuqarı mahkemesinde sözge çıqtı.

Advokat Nikolay Polozovnıñ bergen malümatına köre, Aksönov, kerçekten, 2014 senesi 26 fevralde Qırım MC Yuqarı Şurası yanında ötkerilgen miting vaqıtında «Russkoye yedinstvo» firqası silâlı çatışmağa azırlanğanını itiraf etti.

Qırımda «samooborona» yarımadanıñ işğalinden aldın peyda oldı ve işğal vaqıtında Rusiyege yardım ete edi. 2014 senesi iyün 11 künü Kreml nezaretine keçken Qırım parlamenti bu teşkilâtnı resmiyleştirdi, ve «Narodnoye opolçeniye – Qırım cumhuriyetiniñ milis quvetleri aqqında» qanun qabul etti.

Qırım akimiyeti yarımadada bir sıra bina ve odalarnı «samooboronağa» parasız teslim etti.

Uquq qoruyıcılar defalarca bu silâlanğan teşkilât bir çoq cinayetlerge qarışqanını, ve olarnıñ çoqusı Qırımda alâ daa açıqlanmağanını beyan ete ediler.

XS
SM
MD
LG