Aqyarda çalışqan 22 şirketniñ umumiy borcı tahminen 48 mln. rubleni teşkil ete. Bunı Kreml nezaretindeki Aqyar akimiyetiniñ matbuat hızmeti bildirdi.
Ayrıca, müessisede qayd ettiler ki, bügünki künde «borclularnıñ» cedvelinde dört devlet şirketi bar, olarnıñ umumiy borcı 12 mln. rubleni teşkil ete.
Rusiye tarafından tain etilgen Aqyarnıñ yolbaşçısı Dmitriy Ovsânnikov:«Toplanılğan borclarnı yoq etmek içün ziyade tedbir almaq kerekmiz. Borclanğan şirketleri olğan akimiyet organları, olarnıñ maliyeviy-hocalıq işlerini tüzetmek kerekler. Yolbaşçılarnıñ deñiştirilmesi aqqında qararlar qabul etilmek kerek olsa – qabul etiñiz. Aksi alda «qapalı alqa» olıp çıqa: borclarnı yañ qapattıq – olar kene peyda ola. Fevral 6 kününe qadar alınğan tedbirler ve borclarnıñ ödenilecek tarihlerini kösteriñiz», – dep avale etti.
Matbuat hızmeti, Aqyar akimiyetiniñ emek ve içtimaiy qoruv departament yolbaşçısı Stanislav Borisenkonıñ sözlerini ketirip, bügünki künde Aqyardaki 22 şirketniñ umumiy borcı tahminen 48 mln. ruble teşkil etkenini bildirdi.
Stanislav Borisenko: «Aylıq maaşları boyunca borcnıñ esas qısımı mudafaa-sanayı kompleksiniñ şirketlerinde peyda oldı. Mında episi olıp 34 mln. 846 biñ ruble çıqa. Eñ çoq borcı olğan – Mudafaa nazirliginiñ «771 bağ vastalarınıñ zavodı» devlet şirketidir. Şirketniñ borcı – 21,2 mln. rubleni teşkil ete», – dep bildirdi.
Dekabr ayında Aqyarda işsiz insanlarnıñ sayısı 20 biñge qadar arttı. Kreml nezaretindeki Aqyarnıñ iqtisadiyat departamentiniñ yolbaşçısı Elimdar Ahtemovnıñ sözlerine köre, yarımadada aylıq maaşınıñ orta esabı, qomşu Rusiyedeki orta esapqa nisbetten, 10-12 biñ ruble eksiktir.
2016 senesi noyabr ayında rus akimiyeti açıqtan beyan etti ki, işsizlerge yardım berilmeycek. Rusiye emek ve içtimaiy qoruv naziri Maksim Topilin, çalışıp olğan, faqat işsiz oturğan vatandaşlardan yılda 20 biñ ruble toplamağa teklif etken edi. Federatsiya Şurasınıñ yolbaşçısı Valentina Matviyenko ise bergi tölemegen işsiz vatandaşlar içün tibbiy yardımnı eksiltmege teklif etti.
