Qırım Muhtar Cumhuriyetiniñ prokuraturası Qırım advokatı Emil Kürbedinovnıñ yaqalanması ve evinde keçirilgen tintüv sebebinden mahkemeden aldın taqiqatnı başlattı. Bunı QMC prokuraturasınıñ matbuat hızmeti bildire.
«Qırım Muhtar Cumhuriyetiniñ prokuraturası Ukraina Ceza kodeksiniñ 146-ncı maddesi (azatlıqtan qanunsız alda marum etüv), 162-nci maddesi (mesken bütünliginiñ bozulması), 397-nci maddesi (imayeci ya da şahıs temsilcisiniñ işine qarışuv) belgilegen cinayet çizgilerine köre üç cinaiy esnasnı taqiq etmege başladı», – dep aytıla haberde.
Matbuat hızmeti mezkür malümatnıñ Ukraina mahkemeden aldın taqiqatlar cedveline kirsetilmesiniñ sebebi İnternet ağında Kürbedinovnıñ yaqalanması ve evi ve diger mal-mülk obyektlerinde keçirilgen tintüvlerge dair bir çoq yazı oldı.
Salı künü, yanvar 31-de, Kyivde Emil Kürbedinovğa qoltutmaq maqsadı ile «İmayesiz imayeciler» adlı aktsiya keçirilecektir. Tedbirde cemaat teşkilâtları, Qırımtatar Milliy Meclisiniñ vekilleri, advokat, faal, halqara uquq qorçalayıcı teşkilâtlar ve Ukraina Tışqı işler nazirliginiñ temsilcileri iştirak etecektir.
Advokat Emil Kürbedinov yanvar 26 künü Bağçasarayda Rusiyeniñ silâlı hızmetleri tarafından yaqalandı. O, qırımtatar faali Seyran Saliyevniñ evine, uquqiy yardım köstermek içün kete edi. Aqmescitniñ Demiryol rayon mahkemesi advokat Emil Kürbedinovnı Memuriy qanun bozuvları Kodeksiniñ 20.3 maddesi (Natsist timsalleriniñ teşviqatı ve açıq numayışı) boyunca qabaatlı olaraq tanıdı ve 10 künge apis etti. Bunıñ sebebi – Kürbedinov «Vkontakte» saifesinde 2013 senesi Aqmescitte «Hizb ut-Tahrir» mitingi aqqında yazını paylaşqanı oldı.
Kürbedinov siyasiy işlernen oğraşqan qırımlı advokatlardan biri ola. Onıñ özü ve zenaatdaşları bu yaqalavnı – onıñ advokatlıq faaliyetine qaba şekilde keder etüv olaraq tanıylar.
