Rusiye maliye monitoringi hızmeti nezaret altında bulunğan ve Rusiyede yasaq etilgen «Hizb ut-Tahrir» teşkilâtı ile alâqalarınen qabaatlanğan qırımlılarnı ükümleri çıqarılmağanına baqmadan, olarnı terrorist ve ekstremistler cedveline kirsetti. Bunı Qırım uquq qorçalayıcı gruppası haber ete.
Uquq qorçalayıcılarnıñ malümatına köre, böyle etip, Rusiyede adaletli mahkemeniñ esas printsiplerinden biri – qabaatsızlıq tahminleri – bozuldı.
«Emir-Üsein Kuku bu cedvelde 3415 nomerası altında, Müslim Aliyev – – 468, Arsen Cepparov – 2294, Ruslan Zeytulayev – 2608, Rustem İsmailov – 2884, Yuriy Primov – 4893, Ferat Sayfullayev – 5176, Ayder Saledinov – 5199, Refat Alimov – 524, İnver Bekirov – 1231, Zevri Abseitov – 196, Rustem Abiltarov – 188, Enver Mamutov – 3994, Remzi Memetov – 4135, Vadim Siruk – 5362, Teymur Abdullayev – 110, Üzeir Abdullayev – 111», – dep bildirdi uquq qorçalayıcılar.
Bu cedvelge kirsetilmesi bir de bir maliye tedbirleriniñ ötkerilmesini yasaq etmektedir.
İlmi Umerovnıñ qızı Ayşe 2016 senesi dekabr 30-da bildirdi ki, babası Rusiye maliye monitoringi federal hızmetiniñ saytında derc etilgen terrorist ve ekstremistler cedveline kirsetilgen. Onıñ nomerası 5826. Umerov, bu cedvelge kirsetilmesine qarşı mahkemede itiraz bildirmege niyetli olğanını beyan etti.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
