«Mediazona» sitesi, Emil Kurbedinov 10 künge apis etilgeni munasebetinen, işğal etilgen Qırımdaki vaziyet aqqında Rusiyeli advokatlarınıñ açıq mektübini derc etti.
Mektüpte advokatlar, Rusiye Federatsiyasınıñ Federal advokatlar palatasına muracaat etip, Kurbedinovnı qorçalamaq içün kerekli tedbirlerni almağa rica ete ve onıñ quru siyasiy sebeplerden taqip etilmesine yol bermemege çağıra.
Mektüpte: «Şübesiz, aynı zamanda advokatnıñ yaqalanuvı, içtimaiy ağlarda video-levhanıñ yerleştirilmesi ve onıñ ofisi ve dairesinde tintüvniñ keçirilmesi – mahsus azırlanılğan siyasiy areket edi. Maqsat ise – qorqutmaq, itibardan tüşüreşek malümat tapmaq ve onı zenaat vazifesinden çetleştirmek edi», – dep aytıla.
Bundan ğayrı, Qırım advokatlar palatası tarafından bu advokatnıñ taqip etilmesi «qanuniy» olaraq tanıtılması – ayretlendirici olğanı qayd etile.
Advokat Emil Kurbedinov yanvar 26 künü Bağçasarayda Rusiyeniñ silâlı hızmetleri tarafından yaqalandı. O qırımtatar faali Seyran Saliyevniñ evine, adliyeviy yardım bermek içün kete edi. Aqmescitniñ Demiryol rayon mahkemesi advokat Emil Kurbedinovnı Memuriy qanun bozuvları Kodeksiniñ 20.3 maddesi (Natsist timsalleriniñ teşviqatı ve açıq numayışı) boyunca qabaatlı olaraq tanıdı ve 10 künge apis etti. Bunıñ sebebi – Kurbedinov «Vkontakte» saifesinde 2013 senesi Aqmescitte «Hizb ut-Tahrir» mitingi aqqında yazını paylaşqanı oldı.
Kurbedinov, siyasiy işlernen oğraşqan esas Qırımlı advokatlardan biri ola. Onıñ özü ve zenaatdaşları bu yaqalavnı – onıñ advokatlıq areketine qaba şekilde keder etüv olaraq tanıylar.
