Rusiyeniñ «Memorial» uquq qorçalayıcı merkezi Qırım advokatı Emil Kürbedinovnıñ «ekstremizm ile küreş manaçığı» ile taqip etilmesini toqtatmağa talap etti. Bu aqqında teşkilâtnıñ saytında derc etilgen muracaatta aytıla.
«Memorial» uquq qorçalayıcı merkezi ekstremizm ile küreş manaçığı ile Emil Kürbedinovnıñ taqip etilmesini acele sürette toqtatmağa talap ete. Mahsus hızmetler Qırımda insan aqlarınıñ vaziyetini tenqit etken advokatqa basqı yapa ve onıñ zenaat faaliyetine mania ola», – dep aytıla muracaatta.
Amnesty International uquq qorçalayıcı teşkilâtı yanvar 26-da Rusiye işğal etken Qırımda 10 künge qadar apiske alınğan advokat Emil Kürbedinovnı acele sürette azat etmege çağırdı.
Salı künü, yanvar 31-de, Kyivde Emil Kürbedinovğa qoltutmaq maqsadı ile «İmayesiz imayeciler» adlı aktsiya keçirilecektir. Tedbirde cemaat teşkilâtları, Qırımtatar Milliy Meclisiniñ vekilleri, advokat, faal, halqara uquq qorçalayıcı teşkilâtlar ve Ukraina Tışqı işler nazirliginiñ temsilcileri iştirak etecektir.
Advokat Emil Kürbedinov yanvar 26 künü Bağçasarayda Rusiyeniñ silâlı hızmetleri tarafından yaqalandı. O, qırımtatar faali Seyran Saliyevniñ evine, uquqiy yardım köstermek içün kete edi. Aqmescitniñ Demiryol rayon mahkemesi advokat Emil Kürbedinovnı Memuriy qanun bozuvları Kodeksiniñ 20.3 maddesi (Natsist timsalleriniñ teşviqatı ve açıq numayışı) boyunca qabaatlı olaraq tanıdı ve 10 künge apis etti. Bunıñ sebebi – Kürbedinov «Vkontakte» saifesinde 2013 senesi Aqmescitte «Hizb ut-Tahrir» mitingi aqqında yazını paylaşqanı oldı.
Kürbedinov siyasiy işlernen oğraşqan qırımlı advokatlardan biri ola. Onıñ özü ve zenaatdaşları bu yaqalavnı – onıñ advokatlıq faaliyetine qaba şekilde keder etüv olaraq tanıylar.
