Link açıqlığı

Qırımtatar Milliy Meclisiniñ reis muavini Ahtem Çiygoznıñ davası boyunca mahkemede 2014 senesi fevral 26 mitinginiñ videoları baqıldı, yaqalanğannıñ qabaatı isbatlanmay. Bunı Çiygoznıñ advokatı Nikolay Polozov Qırım.Aqiqatqa bildirdi.

«Video levhaları Ahtem Çiygoznıñ qabaatsız olğanını ve iş taqiqat ve prokurorlar tarafından uydurılğanını qayd ete», – dep ayttı Polozov.

Onıñ aytqanına köre, toplaşuvda Qırım Muhtar Cumhuriyetiniñ Yuqarı Radasınıñ içki azbarınıñ sol tarafından Ukrainağa qoltutqan miting iştirakçileri, «halq göñüllileri» ve Qırım kozaklarınıñ areketini qayd etken levha kösterildi.

«Aynı videode Ahtem Çiygoznıñ yeri qayd etildi, o, Çubarovnen beraber içki azbarnıñ tışında edi. Olarnı keniş bir kolonna ayıra edi, mında ses bağlarından ğayrı, Çiygoznıñ miting iştirakçileri ile köz kontantı yoq edi. Çiygoz miting iştirakçilerini zorbalıq qullanmaları içün provokatsiya etti kibi malümat bergen şaat ve zarar körgenlerniñ aytqanlarına zıt kele», – dep qayd ete Polozov.

Advokat al-azırda qabaat tarafınıñ sorğuğa çekilecek 15 şaat ve eki zarar körgen kişi bar olğanını qoştı. Soñra delillerni kösterme aqqı imaye tarafına keçe.

Polozovnıñ bildirgenine köre, nevbetteki mahkeme oturışı yanvar 31 kününe belgilendi.

Qırım Yuqarı Şura binası etrafında 2014 senesi fevral 26 künü Ukraina birligi içün ötkerilgen miting iştirakçileri ve Rüsiye tarafını tutqan ayrımcılar arasında çatışma yüz bergen edi. Yarımada arbiy küç ile zapt etilgen soñ, Rusiye akimiyeti 26 fevral vaqiaları içün mahkeme işini açtı ve sekiz qırımtatarını kutleviy qalabalıqlarda qabaatladı, şu sırada Qırımtatar Milliy Meclis reisiniñ müavini Ahtem Çiygoz.

Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

Qırım «mahkemesi» Çiygoznı aprel 8-ne qadar apiste qaldırmağa qarar alğan edi.

XS
SM
MD
LG