Kefe şeer şurasınıñ yolbaşçı muavini Sergey Forostân istifağa çıqtı. Bunı o Kefe şeer şurasınıñ 68-ci sessiyası çerçivesinde beyan etti, dep haber ete «Novosti Krıma» agentligi.
O, deputatlarğa muracaat etip: «Eki yıl evelsi siz şeer şura yolbaşçısınıñ muavini vazifesine menim nemzetime qol tuttıñız. Men namus ve insafnen çalıştım. Endi öz istegimnen ketmek vaqıtım keldi», – dedi.
Forostân, deputat olaraq işini devam etecegini ve istifadan soñra öz saylav ilçesinde daa çoq çalışmağa niyetli olğanını ayttı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
