Yanvar 31, salı künü Kyivde «İmayesiz imayeciler» aktsiyası keçirilip, Qırımda qanunsız şekilde apis etilgen advokat Emil Kurbedinovğa destek bildirilecek. Merasimde cemaat teşkilâtları, Qırımtatar Milliy Meclis vekilleri, adbokatlar, faaller ve Ukraina TİN vekilleti iştirak etecek, dep bildire teşkilâtçılar Facebookta.
Bildirüvde: «Aktsiya teşkşlâtçıları, bazı suretlerni qullanıp, işğal etilgen topraqlarda advokat Emil Kurbedinovnıñ apis etilgeninen – sadece advokatnıñ özü qanunsız şekilde (cenk vaqıtında ealiniñ qorunması aqqında Cenevre Konventsiyasınıñ 70 maddesini bozıp) taqip etilgenini degil de, bir-çoq müşterileriniñ imayesiz qalğanları da qayd etilecek», – dep aytıla.
Aktsiyanı «Crimea SOS» teşkilâtı, İnsan aqları içün media teşebbüsi, İnsan aqları boyunca Ukraina Helsinki gruppası, Vatandaş serbestliginiñ merkezi/Euromaidan SOS, İnsan aqları aqqında malümat merkezi teşkil eteler.
Advokat Emil Kurbedinov yanvar 26 künü Bağçasarayda Rusiyeniñ silâlı hızmetleri tarafından yaqalandı. O qırımtatar faali Seyran Saliyevniñ evine, adliyeviy yardım bermek içün kete edi. Aqmescitniñ Demiryol rayon mahkemesi advokat Emil Kurbedinovnı Memuriy qanun bozuvları Kodeksiniñ 20.3 maddesi (Natsist timsalleriniñ teşviqatı ve açıq numayışı) boyunca qabaatlı olaraq tanıdı ve 10 künge apis etti. Bunıñ sebebi – Kurbedinov «Vkontakte» saifesinde 2013 senesi Aqmescitte «Hizb ut-Tahrir» mitingi aqqında yazını paylaşqanı oldı.
Kurbedinov, siyasiy işlernen oğraşqan esas Qırımlı advokatlardan biri ola. Onıñ özü ve zenaatdaşları bu yaqalavnı – onıñ advokatlıq areketine qaba şekilde keder etüv olaraq tanıylar.
