Link açıqlığı

Kreml nezaretindeki Kezlev memuriyetiniñ yolbaşçısı Olesâ Haritonenko ve Dağıstandaki Hasavyurt şeeriniñ yolbaşçısı Zaynudin Okmazov eki şeerniñ arasında işbirlikniñ alıp barılması aqqında añlaşma imzaladılar.

«Añlaşmanıñ esas maqsadı – iqtisadiy, ilmiy-tehnikiн ve medeniy işbirlikniñ pekitilmesi ve keñişletilmesidir. Belediye yolbaşçıları sanayı, qurucılıq, naqliyat, bağ, ilim ve teknika saalarında iş munasebetlerini inkişaf ettirmek niyetindeler», – dep aytıla Kezlev memuriyeti matbuat hızmetiniñ beyanatında.

Hasavyurt şeer memuriyetiniñ yatırımlar bölüginiñ müdiri Gasan Nutsulhanovnıñ sözlerine köre, bu añlaşma sayesinde eki taraflı işbirlik bayağı ileri ketmek mümkün.

«Biz işbirligimizni faal surette arttırmağa tırışacamız, em yatırımlar saasında, em de oquv yurtlarınıñ talebe ve studentleriniñ raatlanması içün ziyeretlerniñ teşkil etilmesinde. Biz turizmniñ türlü çeşitleriniñ inkigafına er taraftan destek berecemiz», – dep qayd etti Nutsulhanov.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG