Bütün dünya qırımtatar kongressiniñ (BDQK) icra komiteti doquz saat devamında qırımtatarlarnıñ vaziyetini muzakere etip, bir sıra qararnı qabul etti. Olardan biri – AQŞ memuriyetine Qırım ve qırımtatarlarnıñ problemlerine dair maruza ile muracaat etmek, dep haber ete QHA.
Bundan ğayrı, BDQTK qırımtatarı Seyran Saliyev ve advokatlar Emil Kürbedinov ve Nikolay Polozovnıñ yaqalanması ve apiske alınmasına dair arizalarnı cemaatqa yetkizecek ola.
«Qırımtatarlarnıñ Litvaniyada yerleşmesiniñ 620-nci yıllığı munasebetinen bu devlette farqlı halqara tedbirlerni keçirmek, olardan icra komitetniñ azaları Adas Yakubauskas, Esma Aciyeva ve Gülnara Bekirova mesülietlidir. Litvaniya mustaqilligi yüz yıllığınıñ abidesine de biñ euro miqdarında para bermege qarar berildi», – dep aytıla qararnıñ beşinci noqtasında.
BDQK icra komitetiniñ planlarına köre, birinci Qırımtatar Milliy Qurultayınıñ yüz yıllığı munasebetinen farqlı tedbirler ötkerilecektir.
Kyivde yanvar 28-de Dünya qırımtatar kongressi icra komitetiniñ yedinci toplaşuvı olıp keçti. Toplaşuvda kongress reisi Refat Çubarov, icra komiteti ve kongressniñ teftiş komissiyasınıñ azaları, Türkiye, Romaniya, Poloniya, Litvaniya ve Qırğızistan diasporalarınıñ temsilcileri iştirak etti. Toplaşuvnı BDQK yanındaki Gençlik komitetiniñ qırımtatar faalleri ziyaret etti.
