Qırım ve Aqyar musulmanları diniy idaresi (QAMDİ) «Qırımtatarlarnıñ yañılıqları ve diniy ananeleri» kitabını çıqardı. Müellifi islâm uquqı magistri ve Qırım musulmanlarınıñ müfti muavini Ayder İsmailov oldı.
Müellif kitap saifelerinde alimlerniñ işlerine esaslanıp, qırımtatarlarnıñ milliy-diniy ananelerine köre yañılıqlarğa dair suallerge cevap bere, dep aytıla QAMDİ matbuat hızmetiniñ haberinde.
«Kitap İslâmdaki yañılıqlarğa dair islâm ilâhiyatçı alimleriniñ fikir ve baqışlarınıñ talilinden ibaret, em de Qırım musulmanlarınıñ yañılıqları ne vaqıt peyda oldı ve al-azırda nasıl qullanılğanını tarif ete», – dep aytıla haberde.
Neşir 2017 senesi yanvar ayında çıqarıldı, cemi 200 nushadan ibarettir.
2014 senesi Rusiyeniñ Qırım işğalinden soñ QAMDİ yapqan areketlerini Meclis ile muzakere etmey. Yanvar 16-17 künleri Herson vilâyetiniñ Geniçesk rayonında olıp keçken Dünya qırımtatar kongressi icra şurasınıñ toplaşuvında esas Ukrainada Müftiylikni qurmağa qarar alındı.
2016 senesi noyabr 19-da 14 qırımtatar din cemiyeti Kyivde toplaşıp, müftiylikni qurdılar. Müfti Ayder Rustamov oldı, o, Kyivdeki qırımtatar cemiyeti yanında Musulmanlarnıñ diniy qıymetleri komitetiniñ yolbaşçısı ola. Alimler şurası da quruldı, onıñ yolbaşçısı olaraq Ukraina musulmanları birliginiñ reisi Suleyman Hayrullayev saylandı.
