Link açıqlığı

«Qırım diversantları davasınıñ» mabusı Redvan Suleymanovnıñ apis müddeti fevral 28-ne qadar uzatıldı. Bunı Radio Svoboda mühbiri Anton Naumlük yanvar 28-de Facebookta bildirdi.

Onıñ aytqanına köre, yanvar 25-de Kreml kontrol etken Kiyev rayon mahkemesi Suleymanovnıñ cezasını uzatmadı, çünki bu iş Qırımnıñ Yuqarı mahkemesine aittir. Taqiqat yanvar 30-da bitken apis müddetiniñ soñuna kelmesinden yedi kün ögüne apis cezasını uzatma arizasını bermek kerek edi.

«Olar endi eki künge keç qalğanlar. Taqiqatnıñ Suleymanovnı apiste qaldıracaq yekâne imkânı bar edi – Kiyev mahkemesiniñ qararından şikâyet etip, onıñ lâğu etilmesine irişmektir. Suleymanovnıñ advokatı keder etmesin dep, Kürbedinovnı 10 künge qadar apiske alğanlar. Ve birden Kiyev mahkemesi Suleymanovnıñ apis müddetini bir ayğa qadar uzattı», – dep yazdı jurnalist.

Naumlük dey ki, apiske alınğan advokat Emil Kürbedinov yerine tayinlengen advokat keldi.

2016 senesi dekabrniñ soñunda yazda Qırımda yaqalanğan «diversant» Suleymanov içün apis müddeti yanvarniñ soñuna qadar uzatılğanı habet etilgen edi.

«Ukrain diversion gruppasında» iştirak etmesi ile qabaatlanğan Redvan Suleymanov Aqmescitteki Taqiqat izolâtorında yata, onıñ davasında taqiqat devam etmekte.

Rusiye kütleviy haber vastaları FSB malümatına esaslanıp, Redvan Suleymanov iyül 30-da Aqmescit ava limanında yaqalanğanını bildirgen edi. Avgust 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.

Avgust 10-da FSB bildirdi ki, avgust 7-ne keçer gecesi Qırımda yarımadada teraktlarnı azırlağan «ukrain diversantları» yaqalandı. Bundan evel Rusiye sıñırcıları üç kün devamında yarımada ile memuriy sıñırdaki kiriş ve çıqış noqtalarını blok etken edi.

Ukraina akimiyeti Moskva bergen malümatını inkâr etip, Rusiye mahsus hızmetleri «provokatsiya» yapa, dep bildire.


XS
SM
MD
LG