Qırımdaki «Hizb ut-Tahrir davasınıñ» mabusı Arsen Cepparovnı kartserge avuştırdılar. Bunı yanvar 28-de mahkümniñ advokatı Cemil Temişev Facebookta bildirdi.
«Onı (Arsen Cepparovnı – QA) SİZOdaki kartserge qapatqanlar. Sebep – saqalıdır. O, olsa bile, saqaldan sebep kartserge qapatmaq qanunğa uyğun bir şey degil. Onıñ betinde saqal tapmağa tırıştım, amma öyle de köremedim», – dep yazdı Temişev.
Qızıltaş qasabasınıñ sakinleri Refat Alimov ve Arsen Cepparov 2016 senesi aprel ayında «Hizb ut-Tahrir» ile bağ tutmasında şeklenilip yaqalanğan ediler.
2016 senesi dekabr 5-de işğal etilgen Aqmescitniñ Kiyev rayon mahkemesi Cepparov ve Alimovnıñ apis cezasını eki ayğa – fevral 8-ne qadar uzattı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
