Qırımtatar Milliy Meclisi Oleg Zubkovğa Türkiyede yañı ayvanat bağçasını açmağa yardım etmeycek. Bunı Meclis reisi Refat Çubarov Zubkovnıñ qırımtatar liderleriniñ Türkiye ükümetinde olğan bağları ve yardımından faydalanmağa azır olğanına dair laflarını izaatlap, Qırım.Aqiqatqa bildirdi.
«Mart 3-de (2014 senesi – QA) Reşat Ametovnı meydanda tutıp alıp kettiler, mart 15-de onı Qarasuvbazar rayonında ölü taptılar. «Qırımnıñ halq göñüllileriniñ» Ametovnıñ öldürüvine alâqası bar olğanını bilemiz. «Qırım halq göñüllilerine» maddiy ve tehnik yardım köstermege başlağan ilk insanlar arasında Zubkov bar edi, olarğa şahsiy avtobus berdi. Meclis ve qırımtatarlarnıñ öldürüvine yardım etken cinayetçi Zubkov arasında bir de bir işbirligi olamaz», – dep ayta Refat Çubarov.
Yanvar 26-da, Qırım kütleviy haber vastalarınıñ malümatına köre, Aqmescitteki matbuat konferentsiyası vaqtında Zubkov Ukraina deputatları Mustafa Cemilev ve Refat Çubarov oña Türkiyede yañı bağça açmaq içün keçirgen muzakerelerde yardım etmegenini bildirip, ileride olarnıñ yardımı ve bağlarından faydalanmağa azır olğanını ayttı.
Qırımdaki «Taygan» arslanlar bağçasınıñ saibi Oleg Zubkov Türkiye akimiyeti ile İstanbul civarında ayvanat bağçasınıñ qurucılığı aqqında añlaşqanını bildirdi.
