Freedom House halqara uquq qorçalayıcı teşkilâtı yanvar 26-da işğal etilgen Qırımda qanunsız alda apiske alınğan advokat Emil Kürbedinov ve faal Seyran Saliyevni acele sürette azat etmege çağıra.
«Rusiye Kürbedinov ve Saliyevni azat etip, işğal altındaki topraqlar boyunca halqara uquq qaidelerine riayet etmelidir. Rusiye küçleri esas printsiplerni bozıp, Qırımnı insan aqlarına riayet etilmegen bir yerge çevirgenler, anda havfsızlıq küçleri tarafından bir de bir adalet olacağına pek az ümüm qalğan», – dep aytıla Freedom House halqara programmaları boyunca prezident muavini Robert Germannıñ beyanatında. Vesiqa Freedom House teşkilâtınıñ Facebook saifesinde aydınlatıldı.
Yanvar 26-da advokat Emil Kürbedinov Rusiye Federatsiyasınıñ Memuriy cinayetler kodeksiniñ 20.3 maddesine köre (Natsist timsalleriniñ teşviqatı ve açıq numayışı) qabaatlı tanılıp, 10 künge qadar apiske alındı.
Yanvar 26-da işğal etilgen Qırımda Rusiye uquq qoruyıcıları tarafından yaqalanğan faal Seyran Saliyev eki maddege köre qabaatlana: Rusiye Memuriy cinayetler kodeksiniñ 20.29 maddesi (ekstremist malümatlarını tarqatuv) ve Rusiye Memuriy cinayetler kodeksiniñ 20.3 maddesi (natsist timsalleri ya da ekstremist teşkilâtı timsalleriniñ teşviqatı ya da açıq numayışı). Onı 12 künge qadar apiske aldılar.
Yanvar 26-da Bağçasarayda qırımtatar faali Seyran Saliyevniñ evinde tintüv keçirildi. Soy-soplarınıñ aytqanına köre, Rusiye uquq qoruyıcıları yasaq etilgen edebiyatnı qıdırğanlar. Saliyevni Rusiye İçki işler nazirliginiñ Bağçasaraydaki içki işler rayon bölügine alıp kettiler.
Aynı şu künü Edem Semedlâyev ve Emil Kurbedinovnıñ qullanğan maşina polis hadimleri tarafından toqtatılğan edi. Soñra ise şu yerge FSB hadimleri kelip, Kurbedinovnı yaqaladılar. Advokatnı «ekstremistik malümatnı tarqatılması» ile qabaatlaylar, oña qarşı toqtatuv tedbiri aqqında qarar Kreml kontrolündeki Aqmescitniñ Demir yol rayon mahkemesinde qabul etilecegi belli oldı.
Emil Kurbedinov «Hizb ut-Tahrir davası» boyunca bir qaç mahkümniñ ve jurnalist Nikolay Semenanıñ advokatı ola.
Keçenleri Aqmescitte FSB hadimleri İlmi Umerov ve Ahtem Çiygoznıñ işlerinde advokat olğan Nikolay Polozovnı yaqalap, sorğuğa alğan ediler. Polozov bu yaqalavnı qaçıruv olaraq tanıy.
