Advokat Emil Kürbedinov Rusiye Federatsiyasınıñ Memuriy cinayetler kodeksiniñ 20.3 maddesine köre (Natsist timsalleriniñ teşviqatı ve açıq numayışı) qabaatlı tanılıp, 10 künge qadar apiske alındı. Bunı Radio Svoboda mühbiri bildire.
Yanvar 26-da Bağçasarayda yaqalanğan advokat Emil Kürbedinov Facebookta IŞİD, Hizb ut-Tahrir ve an-Nusra timsalleri ile 2012-2013 seneleri yazğanları ile qabaatlana.
Mahkemede mütehassısnıñ qararı aydınlatıldı, oña köre, Kürbedinovnıñ saifesindeki timsaller Hizb ut-Tahrir teşkilâtına aittir.
Emil Kürbedinov qabaatını qısmen tanıdı.
Yanvar 26-da Bağçasarayda qırımtatar faali Seyran Saliyevniñ evinde tintüv keçirildi. Soy-soplarınıñ aytqanına köre, Rusiye uquq qoruyıcıları yasaq etilgen edebiyatnı qıdırğanlar. Saliyevni Rusiye İçki işler nazirliginiñ Bağçasaraydaki içki işler rayon bölügine alıp kettiler.
Aynı şu künü Edem Semedlâyev ve Emil Kurbedinovnıñ qullanğan maşina polis hadimleri tarafından toqtatılğan edi. Soñra ise şu yerge FSB hadimleri kelip, Kurbedinovnı yaqaladılar. Advokatnı «ekstremistik malümatnı tarqatılması» ile qabaatlaylar, oña qarşı toqtatuv tedbiri aqqında qarar Kreml kontrolündeki Aqmescitniñ Demir yol rayon mahkemesinde qabul etilecegi belli oldı.
Emil Kurbedinov «Hizb ut-Tahrir davası» boyunca bir qaç mahkümniñ ve jurnalist Nikolay Semenanıñ advokatı ola.
Keçenleri Aqmescitte FSB hadimleri İlmi Umerov ve Ahtem Çiygoznıñ işlerinde advokat olğan Nikolay Polozovnı yaqalap, sorğuğa alğan ediler. Polozov bu yaqalavnı qaçıruv olaraq tanıy.
