Link açıqlığı

Emil Kürbedinovnı «E merkezinden» mahkeme oturışına alıp keteler – Semedlâyev


Kürbedinovnıñ dairesindeki tintüv, 2017 senesi yanvar 26 künü

Advokat Emil Kürbedinovnı Kreml kontrol etken Aqmescit Demir yol rayon mahkemesine yolladılar, andaki toplaşuvda onıñ cezası belgilenecektir, bunı advokat Edem Semedlâyev Qırım.Aqiqatqa bildirdi.

«Oña Rusiye Federatsiyası Memuriy cinayetler kodeksiniñ 20.3 maddesi (Natsist timsalleriniñ teşviqatı ve açıq numayışı) boyunca qabaat berile. Madde para cezası ya da 15 künlik apis cezasını belgilemekte», – dep ayttı advokat.

Radio Svoboda mühbiriniñ malümatına köre, iş mahkemege daa kelmedi.

Şaatlarnıñ bildirgenine köre, advokatqa qoltutmağan kelgen tahminen 30 kişi mahkeme binası yanında toplaştı.

Advokat Edem Semedlâyevniñ aytqanına köre, Kürbedinovnıñ dairesinde keçirilgen tintüv vaqtında tehnika tutıp alındı.

Yanvar 26-da Bağçasarayda qırımtatar faali Seyran Saliyevniñ evinde tintüv keçirildi. Soy-soplarınıñ aytqanına köre, Rusiye uquq qoruyıcıları yasaq etilgen edebiyatnı qıdırğanlar. Saliyevni Rusiye İçki işler nazirliginiñ Bağçasaraydaki içki işler rayon bölügine alıp kettiler.

Aynı şu künü Edem Semedlâyev ve Emil Kurbedinovnıñ qullanğan maşina polis hadimleri tarafından toqtatılğan edi. Soñra ise şu yerge FSB hadimleri kelip, Kurbedinovnı yaqaladılar. Advokatnı «ekstremistik malümatnı tarqatılması» ile qabaatlaylar, oña qarşı toqtatuv tedbiri aqqında qarar Kreml kontrolündeki Aqmescitniñ Demir yol rayon mahkemesinde qabul etilecegi belli oldı.

Emil Kurbedinov «Hizb ut-Tahrir davası» boyunca bir qaç mahkümniñ ve jurnalist Nikolay Semenanıñ advokatı ola.

Keçenleri Aqmescitte FSB hadimleri İlmi Umerov ve Ahtem Çiygoznıñ işlerinde advokat olğan Nikolay Polozovnı yaqalap, sorğuğa alğan ediler. Polozov bu yaqalavnı qaçıruv olaraq tanıy.

XS
SM
MD
LG