Yanvar 26 sabası yaqalanğan advokat Emil Kurbedinovnı «ekstremistik malümatlarnıñ tarqaluvında» qabaatlaylar. Oña qarşı toqtatuv tedbirleriniñ qabul etilmesi boyunca mahkeme toplaşuvı Kreml kontrolündeki Aqmescitniñ Demryol rayon mahkemesinde ötkerilecek.
«Emil Kurbedinov, Aqmescitniñ Dekabristler soqağında Ekstremizmge qarşı küreş Merkezinde buluna. Onı ekstremistik malümatlarnıñ tarqaluvında qabaatlaylar. Toqtatuv tedbiriniñ qabul etilmesi boyunca mahkeme toplaşuvı bügün saat 11-ge Aqmescitniñ Demryol rayon mahkemesinde belgilengen. Onıñ menfaatlarını advokat Cemil Temişev qorçalaycaq», – dep yazdı öz Facebook saifesinde «Qırım birdemligi» birleşmesiniñ faali Anna Bogaçeva.
Bundan ögüne, advokatlar Edem Semedlâyev ve Emil Kurbedinovnıñ maşnasını polis hadimleri toqtatıp, soñra ise FSB hadimleri kelip Kurbedinovnı yaqalağanları belli olğan edi.
Emil Kurbedinov «Hizb ut-Tahrir işi» boyunca bir-qaç mahkümniñ ve jurnalist Nikolay Semenanıñ advokatı ola.
Keçende Aqmescitte FSB hadimleri, İlmi Umerov ve Ahtem Çiygoznıñ işlerinde advokat olğan Nikolay Polozovnı yaqalap, sorğuğa alğan ediler. Polozov bu yaqalamanı qaçıruv olaraq tanıy.
