Link açıqlığı

Bağçasarayda yanvar 26 künü advokat Emil Kurbedinovnı yaqaladılar. Bunı Qurultaynıñ Merkeziy saylav komissiya reisi Zair Smedlâyev öz Facebook saifesinde haber etti.

Bunen beraber Emil Kurbedinov özü de bir video yayınladı, onda körüne ki, Qırımdaki FSB hadimleri maşnağa yaqınlaşalar. Bu maşnada advokat, zenaatdaşı Edem Semedlâyev ile birlikte, evinde o arada tintüv ötrekilgen Seyran Saliyevniñ evine kete ediler.

Advokat Nikolay Polozov öz Twitter saifesinde Emil Kurbedinovnıñ ofisinde tintüv ötkerilgenini haber ete.

Keçende Aqmescitte FSB hadimleri, İlmi Umerov ve Ahtem Çiygoznıñ işlerinde advokat olğan Nikolay Polozovnı yaqalap, sorğuğa alğan ediler. Polozov bu yaqalamanı qaçıruv olaraq tanıy.

Emil Kurbedinov «Hizb ut-Tahrir işi» boyunca bir-qaç mahkümniñ ve jurnalist Nikolay Semenanıñ advokatı ola.

Rusiyeniñ Qırım işğalinden soñ qırımtatarlar yarımadada Rusiye akimiyetini tanımadı. Böylece, Qırımnıñ şimdiki akimiyeti ve uquq qoruyıcıları olarğa qarşı basqı yapmağa başladılar. Dünya toplulığı Qırımda insan aqlarını qorçalamağa çağıra, Rusiyeden ise yarımadada insan aqlarına riayet etmesini talap ete.

Qırımda bir sıra mahkeme esnası keçirile, tintüv ve apis cezaları devam ete. Uquq qorçalayıcılar Rusiye akimiyetiniñ Qırımda yapqanları «siyasetnen bağlıdır» deyler.

XS
SM
MD
LG