Rusiyeniñ Qırımdaki FSB idare taqiqatçısı advokat Nikolay Polozovnı Qırımtatar Milliy Meclis reisiniñ muavini İlmi Umerovğa adliyeviy yardımnıñ berilmesi aqqında soraştırdı. Bunı advokat Qırım.Aqiqatqa bergen izaatında bildirdi.
«Bunıñ episi advokat sırı olğanı içün, men cevap bermege red ettim. Eki saat soñra meni yiberdiler», – dedi Polozov.
O qayd etti ki, Rusiyeniñ Qırımdaki FSB idaresi tarafından yapılğan bu kibi areketler qaçıruv olaraq tasnif etile.
«Bu qaçıruv. Mahkeme qararı olmağanda, vekâletlerini aşıp, taqiqatçı meni mecburen İlmi Umerovnıñ işi boyunca şaat olaraq ketirilmem aqqında qarar aldı. Bir-qaç adam meni soqaqta tuttı, avdobusqa itep Aqmescitte İvan Franko bulvarındaki Qırım ve Aqyar boynca FSB idaresiniñ binasına ketirdi», – dep tarifledi advokat.
Yanvar 25 künü Rusiye FSB hadimlerinden altı kişi Aqmescitte Serov soqağında musafirhane yanında Polozovnı yaqaladılar.
Dekabr 20-de Qırımda advokat Nikolay Polozovğa qarşı cinaiy iş ğayrıdan açıldı. Uquq qorçalayıcılar Rusiye uquq qoruyıcı sistemasınıñ bu areketleri Polozovnı «fevral 26 davasınıñ» imayesinden ayırmaq içün yapıla, dep tüşüne.
Rusiyeniñ Qırım işğalinden soñ qırımtatarlar yarımadada Rusiye akimiyetini tanımadı. Böylece, Qırımnıñ şimdiki akimiyeti ve uquq qoruyıcıları olarğa qarşı basqı yapmağa başladılar. Dünya toplulığı Qırımda insan aqlarını qorçalamağa çağıra, Rusiyeden ise yarımadada insan aqlarına riayet etmesini talap ete.
Qırımda bir sıra mahkeme esnası keçirile, tintüv ve apis cezaları devam ete. Uquq qorçalayıcılar Rusiye akimiyetiniñ Qırımda yapqanları «siyasetnen bağlıdır» deyler.
2014 senesi mart 20-de Yuqarı Rada qırımtatarlarnı Qırımnıñ tamır halqı olaraq tanıdı. Buña 283 deputat qotuttı.
Ukraina qırımtatarlarğa Ukrainanıñ tamır halqı olaraq etnik, medeniyet, til ve din kimliginiñ inkişaf etmesi ve saqlap qalmasını kefil etmektedir.
