İşğal etilgen Qırımda mahkeme, Rusiye FSB muracaatını red etti ve «Qırımlı diversant» Redvan Suleymanovnıñ apiste qalacaq müddetini uzatmadı. Bunı öz Facebook saifesinde Qırımdaki advokat Emil Kurbedinov yazdı.
«Mahkemeci, Redvan Suleymanov içün apis müddetiniñ uzatılması aqqında FSB muracaatını red etti! Müddet 2017 senesi yanvar 30 künü yekünlenecek. Qayd etmege isteyim ki, mahkemeci – bu mahkeme yolbaşçısınıñ muavini Didenko, o Polozovnıñ sorğulanması aqqında FSB muracaatını da red etken edi», – dedi Kurvedinov.
2016 senesi dekabrniñ soñunda, yazda Qırımda yaqalanğan «diversant» Suleymanov içün apis müddeti yanvarniñ soñuna qadar uzatılğanı habet etilgen edi.
«Ukrain diversion gruppasında» iştirak etmesi ile qabaatlanğan Redvan Suleymanov Aqmescitteki Taqiqat izolâtorında yata, onıñ davasında taqiqat devam etmekte.
Rusiye kütleviy haber vastaları FSB malümatına esaslanıp, Redvan Suleymanov iyül 30-da Aqmescit ava limanında yaqalanğanını bildirgen edi. Avgust 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.
Avgust 10-da FSB bildirdi ki, avgust 7-ne keçer gecesi Qırımda yarımadada teraktlarnı azırlağan «ukrain diversantları» yaqalandı. Bundan evel Rusiye sıñırcıları üç kün devamında yarımada ile memuriy sıñırdaki kiriş ve çıqış noqtalarını blok etken edi.
Ukraina akimiyeti Moskva bergen malümatını inkâr etip, Rusiye mahsus hızmetleri «provokatsiya» yapa, dep bildire.
