Qırımtatar Milliy Meclisiniñ reis muavini İlmi Ümerov FSB taqiqatçısına çağırıldı, oña «qabaatı yañı şekilde» taqdim etilecektir. Bunı o Facebook saifesinde yazdı.
«Tünevin (yanvar 24-de – QA) FSB taqiqatçısı telefon etti. Cuma künü, yanvar 27-de, saat 14:30 körüşmege añlaştıq. Qabaat yañı şekilde (qabaat ğayrıdan aydınlatılacaq) taqdim etilecektir. Bu ne manağa kelgenini bilmeyim. «Körüşüvden» soñ mümkün olğanını aytarım», – dep yazdı Ümerov.
Malüm olğanı kibi, Ümerov mahkemede Rusiye terroristleri ve ekstremistleri cedveline kirsetilgeninden şikâyet etmek niyetinde.
İlmi Ümerovnıñ qızı Ayşe 2016 senesi dekabr 30-da bildirdi ki, babası Rusiye maliye monitoringi federal hızmetiniñ saytında derc etilgen terrorist ve ekstremistler cedveline kirsetilgen. Onıñ nomerası 5826.
