Link açıqlığı

Qırımda tatiller vaqtında 6 million turist kelecegini bekleyler – matbuat vastaları


Qırımdaki yalı. Örnek resim

İşğal etilgen Qırımda 2017 senesi kurort mevsiminde 6 million turist kelecegini bekleyler. Bunı «RİA Novosti Krım» Kreml kontrol etken Qırım parlamentiniñ şimahane-kurort kompleksi ve turizm komitetiniñ yolbaşçısı Aleksey Çernâkniñ malümatına esaslanıp bildire.

Onıñ aytqanına köre, 2016 senesi Qırım 5 million 573 biñ turistni qabul etti, dep qayd ete neşir, bu raqam 2015 senesine baqqanda 21%-ğa ziyadedir.

«2017 senesi, keçken sene olğanı kibi, tahminen 5,6-6 million turistni bekleycekmiz. Qırımğa raat-raat kele bilecek insanlarnıñ eñ büyük raqamıdır», – dep ayttı Çernâk.

Onıñ bildirgenine köre, Keriç parom keçiti ve Aqmescit ava limanı tatiller vaqtında tolu şekilde çalışalar.

«Keriç boğazında bizni qıta ile birleştirecek köpür çalışmağa başlağan soñ, elbet de, çoq şey deñişir. Demir yolları çalışmağa başlasa, Qırım daa çoq insannı qabul etmege planlaştıra», – dep qayd etti Çernâk.

Yañı yıl bayramlarında Qırımda 2015 senesine baqqanda eki qat ziyade turist bulundı, dep bildirdi yanvar 13-de Kreml kontrol etken Qırım kurort ve turizm nazirligi. Rusiye naqliyat naziriniñ muavini Viktor Olerskiy Rusiye naqliyat nazirligi Qırımğa yolcu gemilerinen kelgen turistler içün vizasız rejim kirsetmege teklif etkenini bildirgen edi.

XS
SM
MD
LG