Kreml kontrol etken Qırım Yuqarı mahkemesi Bağçasaray rayon mahkemesiniñ Enver Şerfiyevni memuriy mesüliyetke çekmek qararından berilgen şikâyet arizasını qısmen qanaatlendirdi.
Bağçasaray mahkemesiniñ zanınca, Şerfiyev 2016 senesi mayısta qırımtatarlarnıñ evlerinde keçirilgen tintüvlerge narazılıq bildirmek içün «Salaçıq» qavehanesi yanında toplaşqan Bağçasaray sakinleriniñ qanunsız kütleviy tedbirinde iştirak etti.
«Bu toplaşuv cemaatnıñ demokratik açıqlığı çerçivesinde oldı, bu aktsiya degil, qırımtatarlarnıñ evlerinde tintüv keçirgen uquq qoruyıcı organlarnıñ areketlerine bir cevaptır. Bundan ğayrı, nizam bozulmadı, maşina keçmesi ve içtimaiy infrastruktura içün bir mania olmadı», – dep añlattı mahkemede Şerfiyevniñ imayecisi Lilâ Demerci.
İmayeniñ Bağçasaray mahkemesinden kelgen işte mayıs vaqialarınıñ şaatlarını sorğuğa çekmek muracaatları tapılmadı, dep bildire Radio Svoboda mühbiri.
Lilâ Demerciniñ aytqanına köre, Enver Şerfiyev uquq qoruyıcı ve toplaşqan şaatlarnı kamerağa çıqarıp, içtimaiy ağlarda ve kütleviy haber vastalarında derc etecek edi. İmayeciniñ malümatı mahkemecini işandırdı, ve Bağçasaray mahkemesiniñ Şerfiyevge 15 biñ ruble miqdarında para cezasını bermek qararı lâğu etildi. Aynı vaqıtta, Şerfiyevniñ areketleri Memuriy cinayetler kodeksiniñ 20.2 maddesiniñ 5-inci qısmına köre cinayet olaraq tanıldı, Şerfiyevge 10 biñ ruble para cezası berildi.
Mayıs 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirdi. Bağçasaraynıñ dört sakini terrorizm ile qabaatlanıp yaqalandı: Zevri Abseitov, Remzi Memetov, Rustem Abiltarov ve Enver Mamutov. Olarnı Rusiyede yasaq etilgen «Hizb ut-Tahrir» teşkilâtında iştirak etmesi ile qabaatladılar.
