Bağçasaray mahkemesi Bağçasarayda qırımtatarlarda keçirilgen tintüvlerniñ şaatı olğan Osman Belâlovnı qanunsız kütleviy aktsiyada iştirak etmesi ile qabaatlap 10 biñ ruble para cezasını berdi. Bunı Qırım.Aqiqat mühbiri bildirdi.
Qabaat tarafınıñ malümatına köre, 2016 senesi mayıs 12-de Bağçasaray sakinleri qırımtatarlarda keçirilgen tintüvlerden sebep «Salaçıq» qavehanesi yanında toplaşıp, qanunsız aktsiyanı keçirgenler. Tintüvler neticesinde Zevri Abseitov, Remzi Memetov, Rustem Abiltarov ve Enver Mamutov yaqalandı. Olarnı Rusiyede yasaq etilgen «Hizb ut-Tahrir» teşkilâtında iştirak etmesi ile qabaatladılar.
Osman Belâlov qabaatını tanımayıp, sakinler vaqianı muzakere etmek içün toplaştı, bir de bir timsal ya da şiarları olmadı, videoğa köre, maşinalarnıñ areketine de keder etmediler, dep bildirgen edi.
«Toplaşuvnıñ başında bir sıra muracaat berdik, olarnı red etkenler. Tahmin etken edik. İş malümatlarını ögrenmeyip, şaatlarnıñ malümatını aydınlatmayım ve ögrenmeyip, şaatlarnı çağırma muracaatını bermege imkân bermeyip, mesleat odasına ketti. Bizni diñlep başını salladı ve 10 biñ ruble para cezasını berdi. Şikâyet arizasını bermek içün 10 künümiz bar. Mıtlaq şikâyet etecekmiz», – dep ayttı Belâlovnıñ imayecisi Lilâ Gemeci.
Berilgen malümatqa köre, al-azırda aynı sebepten qavehane saibi Marlen Asanov ve daa bir qaç insan, şu cümleden Enver Şerfiyevge memuriy ceza berildi. O, şikâyet arizasını berdi. Onı yanvar 24-de Qırımnıñ Yuqarı mahkemesi baqacaqtır.
Mayıs 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirdi. Bağçasaraynıñ dört sakini terrorizm ile qabaatlanıp yaqalandı: Zevri Abseitov, Remzi Memetov, Rustem Abiltarov ve Enver Mamutov.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
