«Hizb ut-Tahrir davası» boyunca mahküm etilgen üç Qırım musulmanı Nuri Primov, Ferat Sayfullayev ve Rustem Vaitov Rusiyeniñ Rostov-na-Donu şeerindeki SİZO-1-den avuştırıldı. Bunı yanvar 22-de «Rosuznik» leyhasınıñ koordinatorı Yana Gonçarova Facebooktaki saifesinde bildirdi.
Daa bir mahküm Ruslan Zeytullayev SİZOda qalıp, işi ğayrıdan baqılacağını bekley, dep qoştı Gonçarova.
«Bugün Rostov-na-Donu şeerindeki SİZO-1-de «Hizb ut-Tahrir davası» boyunca mahküm etilgen üç Qırım musulmanı – Nuri Primov, Ferat Sayfullayev ve Rustem Vaitovnı alıp ketkenlerini ögrendim. Cuma künü ukrain konsullarına er kes yerinde qala, dep cevap kelgen edi. SİZOda Ruslan Zeytullayev işi ğayrıdan baqılacağını bekley. Advokat Emil Kürbedinov da bu malümatnı tasdıqladı», – dep aytıla haberde.
Rostov-na-Donu şeerindeki Şimal-Kavkaz bölge arbiy mahkemesi sentâbr 7-de iyün 1-den başlap «Hizb ut-Tahrir» ile alâqalarınen qabaatlanğan Qırım musulmanlarınıñ işi boyunca ükmüni çıqardı.
Mahkeme qararına binaen, Aqyar sakini Ruslan Zeytullayev «Hizb ut-Tahrir» bölügini teşkil etti dep yedi yılğa, Ferat Sayfullayev, Rustem Vaitov ve Nuri Primov ise beş yılğa qadar apiske alındı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
