Link açıqlığı

Yanvar 23 kününden başlap Yaltada Ay-Petrige alıp barğan arqan yolunı qapatalar. Bunı beyan etken ilân biletler satılğan kassalarda asılğan.

Bunnen beraber arqan yolu ne qadar vaqıt devamında qapalı olacağı aqqında bildirilmey. İlânda berilgen malümatqa köre, arqan yolu qorçalayıcı baqım işleri ötkerilecegi sebebinden işini toqtata.

«2017 senesi yanvar 23 kününden başlap arqan yolu, planğa köre, qorçalayıcı baqım yapılacağı sebebinden işini toqtata ve 2017 senesiniñ turistik mevsimine azırlanılacaq», – dep haber etile.

Qırım.Aqıqat muhbiriniñ bildirgenine köre, turistler arqan yoluna kelmege devam eteler ve kassalar ögünde obyekt çalışmağanını ögreneler. Ende, Ay-Petrige barıp çıqmaq içün turistler taksinen dağğa alıp barğan yoldan politsiya teftiş noqtasına qadar keteler. Ondan soñ turistler cayav keteler, soñra ise başqa arabağa mineler. Böyle hızmet ile bir tarafqa barmaq 500 rublege çıqa.

«Mishor – Ay-Petri» arqan yolu – meşur turistik obyektlerden biridir. 2013 senesi arqan yolundaki arqannı yañısına deniştirgen ediler, o Avstriyada sımarış etilgen edi. Turistik obyektiniñ sitesinde bildirile ki, bu arqan yolu 1670 metrlik mesafeden tayamasız keçirilgeni içün Avroppada böyle qurulğan eñ uzun arqan yolu olaraq Guinness rekordlar kitabına kirsetilgen.

XS
SM
MD
LG