Ukraina prezidenti Petro Poroşenko Birleşken Milletler Teşkilâtınıñ baş kâtibi António Guterresni «işğal etilgen Qırım ve Donbassta insan aqlarınıñ bozulmasına ziyade diqqat ayırmağa çağırdı».
Ukraina prezidenti memuriyetiniñ matbuat hızmeti yanvar 19-da bildirdi ki, Poroşenko BMT baş kâtibi António Guterres BMT nizamnamesiniñ esas maqsatları ve printsiplerine riayet etip, mustaqil devletlerniñ topraq bütünligi ve devlet sıñırlarını ürmet etecek, dep ümüt ete.
Berilgen malümatqa koyer, Poroşenko ve Guterres körüşip, Ukrainanıñ Havfsızlıq şurasında aza olğanını köz ögüne alıp, BMT çerçivesinde ileri işbirligini muzakere ettiler.
Yanvar 16-da Ukraina Birleşken Milletler teşkilâtında eñ yüksek mahkeme organı olğan Halqara mahkemege muracaat etip, Rusiye terrorizmniñ maliye etilmesi ve millet ayırımı ile küreşke dair halqara konventsiyalarnı boza, dep dava açtırdı. Ukraina Tışqı işler naziligi Rusiye Qırımda rus olmağan cemiyetler, şu cümleden etnik ukrain ve qırımtatarlarnı ayırımğa oğratıp, millet ayırımınıñ er angi çeşiti ile küreş Konventsiyasını boza, dep qayd ete.
Rusiyeniñ Qırım işğalinden soñ Donbassta silâlı zıddiyet devam ete. Ukraina ve Ğarp Rusiyeni separatistlerge qoltutqanı ile qabaatlaylar. Kreml bunı inkâr etip, Donbassta Rusiye «göñüllileri» bar ola bile, dep bildire.
