Qırımtatar Milliy Meclis reisi, Yuqarı Radada «Petro Poroşenkonıñ Blokı» fraktsiyasınıñ deputatı Refat Çubarov, devlet yolbaşçısı Petro Poroşenkonı ve Ukraina akimiyetini, Konstitutsion Komissiyanı toplap, Qırımnıñ Qırımtatar Muhtar Cumhuriyetine çevirilmesi aqqında Esas Qanun deñişmelerini azırlama çağırdı.
«Men tekrar Ukraina prezidentine ve akimiyetine muracaat etip, eñ yaqın zamanda Konstitutsion Komissiyanı toplamağa, ve Ukraina Konstitutsiyasınıñ «Qırım Muhtar Cumhuriyeti» adlı 10-cı bölügine deñişmelerni azırlamağa çağıram. Bizler Qırım Muhtar Cumhuriyetini – Ukrainanıñ ayırılmaz qısımı olaraq Qırımtatar Muhtar Cumhuriyetine çevirmek kerekmiz», – dedi Çubarov parlamentniñ toplaşuvında.
O hatırlattı ki, 1945 senesi qırımtatar halqı sürgün etilgeni sebebinden yoq etilgen Qırımnıñ mühtariyetini – ğayırdan tiklemek suali boyunca umumqırım referendumı 26 yıl evelsi, yanvar 20 künü keçirilgen edi.
Konstitutsion Komissiya – Ukraina prezidenti yanında yardım organı ola. Onıñ maqsadı – Konstitutsiyağa uyğun deñişmelerniñ azırlanılması. Şimdilik Ukrainanıñ Esas Qanunında – Qırım Muhtar Cumhuriyeti Ukrainanıñ ayırılmaz qısımı olğanı qayd etile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. Ğarp memleketleri de Qırımnıñ işğali qabul etmey ve bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
