Link açıqlığı

Saatnıñ esas haberi

Qırımlı jurnalist Semenağa berilgen iddianameniñ tafsilâtı belli oldı


Qırımda jurnalist Nikolay Semenağa yanvar 20 künü separatizm (Rusiye CK 280.1 maddesi – QA) boyunca mahkeme işiniñ iddianamesini taqdim ettiler. Taqiqatnıñ iddiasına köre, Qırımlı jurnalist «Rusiye Federatsiyasınıñ topraq bütünligini bozmaq çağıruvları ile «Blokada – Qırımnıñ azat etilmesi içün kerekli olğan ilk adım» serlevalı maqale azırladı».

İddianamede, taqiqatnıñ «separatist» olraq tanığan metinniñ parçaları ketirilgen ve Nikolay Semena maqaleniñ metinini muarririyetke nasıl etip yollağanı tetamatnen kösterilgen. Semenanıñ özü bu qabaatnı inkâr ete. Taqiqatnıñ iddiasına köre, Semena «Rusiye Fedaratsiyasına qarşı siyasiy zıddiyet sebebi ile» qanunnı bozdı.

İddianıñ isbatı olaraq Semenanıñ sözleri ve onıñ muarririyetke yollağan, ve birden silgen, elektron mektübi ketirile.

Vesiqada, qabaatlayıcılar tarafından soraştırılğan şaatlarnıñ ifadeleri de ketirile. Şaatlar olaraq FSB hadimleri çıqtı. Olar ifadelerinden ğayrı, «işniñ operativ ceryanı» – tintüvler, alınğan tehnikada tapılğan malümat, şu cümleden onıñ şahsiy yazışuvları aqqında tarif ettiler.

Şaatlardan biri – şimdi, ilk malümatlarğa köre, «LNR» zümresiniñ matbuat hızmetinde çalışqan, Qırımlı jurnalist Sergey Meşkovoy çıqtı. Jurnalist dey ki, «Semenanıñ azırlağan maqaleleri er zaman Qırım cumhuriyetinde olğan içtimaiy-siyasiy vaziyetni yeterli qadar obyektiv olaraq tariflemey edi, ve açıq-aydın şekilde Ukrainanı desteklep Rusiyege qarşı noqta-i nazarğa riayet ete edi».

İddianamege binayen, işniñ malümatlarına FSB teşebbüsinen keçirilgen (lisan ve müellif) ekspertizalarnıñ neticeleri qoşulğan. Malümatlarğa rusiyeli ekspert Mihail Savvanıñ siyasetşınas teşkerüvi de qoşulğan, o «Qırım toprağı Ukrainağa ait olğanı ve Rusiye Federatsiyasınıñ qanunları bu topraqlar içün keçerli olmağanını» yaza. Mihail Savva vesiqada imayeniñ şaatı olaraq keçe. Ondan da ğayrı imayeciler Qırım.Aqiqatnıñ muarriri Volodımır Prıtuladan ve ekspertten sorğu soramağa niyetli.

Semenanıñ advokatı Emil Kurbedinov qayd etti ki, iddianame cinaiy-protsessual kodeksniñ bozuvı ile taqdim etildi: vesiqanı prokuraturanıñ temsilcisi bermeli edi, Semenağa ise FSB taqiqatçısı Aleksandr Parşutin, idare binasında teslim etti.

Baarde Qırımda Qırım.Aqiqat ile işbirliginde şeklengen jurnalistlerniñ evlerinde tintüvler olıp keçti. Radio Svoboda müellifi Nikolay Semenağa qarşı Rusiye Federatsiyasınıñ topraq bütünligini bozmaq çağıruvları şeklenmesi ile cinaiy iş açıldı. Rusiye taqiqatı oña yarımadanı terk etmege yasaq etti.

Nikolay Semenanıñ imayesi, Halqara ve Avropa Jurnalistler Federatsiyası, em de Söz serbestligi boyunca OSCE temsilcisiniñ ofisi, Rusiye Federal telükesizlik hızmetini – jurnalistni, tedaviylenmek içün, Qırımdan yibermege çağırdı, şimdige qadar musbet cevap daa alınmadı.

Ukraina Tışqı işler nazirligi işğal etilgen Qırımda Ukraina vatandaşları, şu cümleden Nikolay Semenanıñ taqip etilmesinden qasevetlengenini bildirip, oña qarşı yapılğa basqını toqtatmağa çağırdı.

XS
SM
MD
LG