Ukraina Yuqarı Rada deputatı, qırımtatar halqınıñ lideri Mustafa Cemilev, yanvar 20 künü Qırım Muhtar Cumhuriyetiniñ Kününde, semetdeşlerine muracaat etip, yarımadanı terk etmemege rica etti, Ğarp memleketlerni ise – iqtisadiy sanktsiyalarnı lâğu etmemege çağırdı.
«Biz semetdeşlerimizni bu topraqlarnı terk etmemege çağıramız. Ücüm etken devletke basqı yapıp, Qırım azat etilecegini köremiz. İlk evelâ – iqtisadiy sanktsiyalar o qadar effektiv olmalılar ki, ücümcini halqara uquqqa riayet etmege ve özüni yahşı alıp barmağa mecbur ettirmeli», – dedi Cemilev «Novoye vremâ» mecmuasına bergen izaatında.
O qayd etti ki, 2016 sensi Ukraina büyük diplomatik ğalebelerge irişti.
«2016 senesi devamında Ukraina büyük diplomatik yeñişler elde etti. Bu sırada PACE rezolütsiyası, BM Baş Assambleyasınıñ qararı, OSCE deklaratsiyası, Halqara Mahkeme prokurorınıñ qararı. Bu müsbet adımlar. Lâkin esası – Rusiyeni öyle bir vaziyetke ketirmek ki, onıñ, ücümni toqtatmaqtan ğayrı, başqa iç bit yolu qalmasın. Sanktsiyalar küçlenecegine ya da eñ azından şimdiki şekilde devam eteceklerine ümüt etem», – dedi Cemilev.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
