Link açıqlığı

Saatnıñ esas haberi

Trenlerniñ suratı tezleşecegi sebebinden «Qırım demiryolları» areket cedvelini deñiştirecek


Tasviriy resim
Tasviriy resim

Şeerler arasında yürgen trenler, artıq saatte 100 km suratınen yürecekleri sebebinden «Qırım demiryolları» yañı areket cedvelini qabul etecek. Bunı muessiseniñ matbuat hızmeti bildire.

«Demiryol naqliyatınıñ yañı areket cedveli 2017 senesi yanvar 26 kününden başlap amelge keçecek ve trenlerniñ areketi saatte 100 km qadar tezleşecegini esapqa alacaq», – dep bildirile.

Berilgen malümatqa köre, Aqmescit-Canköy, Aqmescit-Aqyar tarafına yürgen trenlerniñ yolda keçirecek vaqıtları 1 saat 50 daqqağa azlaşacaq.

Bundan evel Qırımda demiryolunıñ büyük tamir işi yapılacağı aqqında haber etilgen edi. Böylece, alqa yollar yerine eklenmesiz çıtalar qoyulğanı ve neticede trenlerniñ suratı saatte 120 kilometrge qadar arta bilecegi aytıla edi.

Müessisede qayd etkenlerine köre, «eklenmesiz çıtalar Krasnopartizanskaya-Yefremovskaya, Yefremovskaya-Elevatornaya, Elevatornaya-Prolötnaya aralıqlarında, Krasnopartizanskaya, Yefremovskaya ve Elevatornaya stantsiyalarında qoyulacaq».

2014 senesi mart 26 künü Kremlge bağlı olğan Qırım parlamenti tarafından «Qırım demiryolları» devlet müessisesi teşkil etilgeni aqqında haber etilgen edi. Yarımadada demiryol naqliyatınıñ işini teminlegen şirket, müessise ve teşkilatlarnıñ mülkü bu qurulışnıñ idaresine keçti.

XS
SM
MD
LG