Link açıqlığı

Yaltalı «Hizb ut-Tahrir davasınıñ» daa bir mabusı Rusiyede akimiyetni küçnen zapt etüv ile qabaatlandı – advokat


Vadim Siruk, arhiv fotoresimi

Qırım advokatı Emil Kürbedinov bildire ki, FSB Yaltalı «Hizb ut-Tahrir davasınıñ» mabusı Vadim Siruknı Rusiyede akimiyetni küçnen zapt etüv ile qabaatladı. Bunı advokat yanvar 18-de Facebook saifesinde yazdı.

«2017 senesi yanvar 17-de FSB Vadim Siruknı Rusiye Ceza Kodeksiniñ 278-inci maddesine köre cinayet işlemesi ile qabaatladı. FSB fikirince, Vadim bir taqım insanlarnen Rusiyede akimiyetni küçnen zapt etmege veye anayasa qurumını küçnen deñiştirmege azırlana edi», – dep yazdı Kürbedinov.

Rusiye FSB hadimleriniñ bunıñnen bağlı bir izaatları şimdilik yoq.

Yanvar 12-de Qırım advokatı Emil Kürbedinov «Hizb ut-Tahrir davasınıñ» mabuslarını Rusiyede akimiyetni küçnen zapt etüv ile qabaatlay bileler, dep tenbiyelegen edi.

Rusiye Federatsiyası Ceza kodeksiniñ 278-inci maddesi 12 yıldan 20 yılğa qadar apis cezasınıñ berilmesini belgilemektedir.

«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.

Uquq qorçalayıcılar apiske alınğan Yalta sakinlerini siyasiy mabus olaraq tanıy.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.


XS
SM
MD
LG