Aqmescitte Cuma Cami qurucılığınıñ leyhası tasdıqlandı. Bunı yanvar 18-de şeer memuriyetiniñ matbuat hızmeti bildirdi.
«Yarımadanıñ eñ büyük cami qurucılığınıñ leyhası şeer qurucılığı şurasınıñ azaları tarafından tasdıqlanıldı», – dep qayd ete matbuat hızmeti.
Qayd etile ki, toplaşuvda Cuma Cami rayonında maşina areketi ve park yeri muzakere etildi.
«Aqmescit memuriyetiniñ yolbaşçısı Gennadiy Baharev qayd etti ki, al-azırda bu meseleniñ al etilmesinen bağlı çeşit türlü qarar leyhaları azırlana, tehnikiy vazifeler berildi», – dep qayd ete Aqmescitniñ Rusiye memuriyeti.
Qırımnıñ kütleviy haber vastaları Aqmescitte Cuma Caminiñ temel taşı qoyuldı, dep bildirgen edi. Qırımnıñ milletlerara munasebetler ve sürgün olunğan vatandaşlar işleriniñ devlet komiteti reisi Zaur Smirnov temeli qoyula, dep aytqan edi. Qırımda Cuma Cami qurucılığı Aqmescitte 2015 senesi sentâbr 25-de başladı. Kreml kontrol etken yarımada akimiyeti qurucılıq eñ az üç yıl devam etecek, dep bildirgen edi.
Qırımtatar Milliy Qurultayı Merkeziy saylav komissiyasınıñ reisi Zair Smedlâyev Aqmescitte Cuma Cami temeli degil, Qırım müftiyligi içün memuriy bina temeli qoyuldı, dep bildirdi.
