Link açıqlığı

Birleşken Milletlerniñ Halqara mahkemesi Kremlni Qırımdaki repressiyalarnı eksiltmege mecbur ete bile – Çubarov


Refat Çubarov

Birleşken Milletler Teşkilâtınıñ Halqara mahkemesi Rusiyede insan aqlarınıñ bozulması toqtatılsın dep alğan tedbirler işğal etilgen Qırımda repressiyalarnı eksiltecektir, dep bildirdi Qırımtatar Milliy Meclisiniñ reisi Refat Çubarov Qırım.Aqiqatqa.

«Bu Ukraina vatandaşları ve, ilk evelâ, qırımtatarlarğa qarşı repressiyalarnı azlaştırır edi. Qırımtatar Milliy Meclisiniñ işi, söz serbestligi, insan aqları, barışıq toplaşuvlar aqqı aqqında laf kete. Bularsız cemiyet yaşap olamay, amma al-azırda Qırım bu adiy şeylersiz yaşay», – dep ayttı Çubarov.

O, BMT Halqara mahkemesinde dava baqılğanda Ukrainanıñ imkânlarına qıymet kesip, esnas uzun olacaq, amma «bunı yapmaq kerek», dep qoştı.

Yanvar 16 künü Ukraina BM Halqara mahkemesine muracaat etip, terrorizm ve ırq ayırımına maddiy destekekniñ toqtatılması aqqında halqara konventsiyalar Rusiye tarafından bozulğanına şikâyet etti. Ukraina Tışqı işler naziligi Rusiye Qırımda rus olmağan cemiyetler, şu cümleden etnik ukrain ve qırımtatarlarnı ayırımğa oğratıp, millet ayırımınıñ er angi çeşiti ile küreş Konventsiyasını boza, dep qayd ete.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG