Qırımtatar Milliy Meclis reisniñ muavini Ahtem Çiygoznıñ işi boyunca mahkemede 26 fevral 2014 senesi çekilgen video qaydlar şekilindeki maddiy isbatlar, qazalanğanlarnıñ ifadelerini red ete. Bunı Radio Svoboda muhbirine Çiygoznıñ advokatı Nikolay Polozov bildirdi.
«Kösterilgen video qaydlar, bundan evel şaat ve qazalanğanlarnıñ bergen ifadelerini red ete. Olar dey ediler ki, sanki olar Ahtem Çiygoznıñ sözlerini bir-qaç onluq metr uzaqlıqta eşite bile ediler. Albu ki Çiygozden bir-qaç metr çette turğan kamera onıñ ya da diger iştirakçilerniñ sözlerini seslendirip olamay. Bütün seslerni biñlernen adamnıñ sedası qaplap ala», – dedi Polozov.
Advokatnıñ sözlerine köre, kösterilgen videolarda «Ahtem Çiygoz iç bir şekilde ciddiy teşkiliy-idariy vazifelerni eda etmey. Sıranı tertipley, İlmi Umerovnen, Zair Smedlâyevnen ve Qırımtatar Milliy Meclisiniñ diger azalarınen qonuşa».
«Ve daa bir noqta: videoda Aksönovnıñ (işğal etilgen Qırımnıñ rus yolbaşçısı – QA) idareci vazifesi pek yahşı körüne, o raqiplerine qarşı areket etmek içün insanlarnı teşkilâtlandırğan edi», – dedi Çiygoznıñ advokatı.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Rus Birligi» firqası, miting iştirakçilerine qarşı çıqtı.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Qırım «mahkemesi» Çiygoznı aprel 8-ne qadar apiste qaldırmağa qarar alğan edi.
