Kreml nezaretindeki Qırım Yuqarı mahkemesi «Qırımlı diversantlardan» biri olğan Redvan Suleymanovnı 2017 senesi yanvar 20 kününe qadar apiste qaldırdı. Bunı Radio Svoboda habet ete.
«İtiraz şikâyeti red etildi, apis müddeti aqqında qarar küçüni coymadı», – dep aytıla bildirüvde.
Mahkemeniñ alğan qararı aqqında bu malümatnı Qırımlı advokat Emil Kurbedinov ta tasdiqladı.
«Redvan Suleymanovnı apiste qaldırdılar. Yaqın künlerde cinaiy işteki malümatlarnıñ ögrenilüvi yekünlenecektir, ve FSB bu işni mahkemege teslim etecegi beklenile», – dep yazdı advokat öz Facebook saifesinde.
2016 senesi dekabrniñ soñunda, yazda Qırımda yaqalanğan «diversant» Suleymanov içün apis müddeti yanvarniñ soñuna qadar uzatılğanı habet etilgen edi.
«Ukrain diversion gruppasında» iştirak etmesi ile qabaatlanğan Redvan Suleymanov Aqmescitteki Taqiqat izolâtorında yata, onıñ davasında taqiqat devam etmekte.
Rusiye kütleviy haber vastaları FSB malümatına esaslanıp, Redvan Suleymanov iyül 30-da Aqmescit ava limanında yaqalanğanını bildirgen edi. Avgust 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.
Avgust 10-da FSB bildirdi ki, avgust 7-ne keçer gecesi Qırımda yarımadada teraktlarnı azırlağan «ukrain diversantları» yaqalandı. Bundan evel Rusiye sıñırcıları üç kün devamında yarımada ile memuriy sıñırdaki kiriş ve çıqış noqtalarını blok etken edi.
Ukraina akimiyeti Moskva bergen malümatını inkâr etip, Rusiye mahsus hızmetleri «provokatsiya» yapa, dep bildire.
