Link açıqlığı

Aqmescitte Qırımtatar Milliy Meclisiniñ reis muavini Ahtem Çiygoznıñ davası baqılğan Kreml kontrol etken Qırım Yuqarı mahkemesiniñ binası yanında toplaşqan qırımtatarlar uquq qorçalayıcı, qırımtatar milliy areketiniñ veteranı Zampira Asanovanı añıp dua oqudılar.

Videonı yanvar 17-de Facebookta Qırımtatar Milliy Qurultayı Merkeziy saylav komissiyasınıñ reisi Zair Smedlâyev derc etti.

Dua ve qısqa bir vaaznı Enver Muslâdinov seslendirdi. Duada «qırımtatar halqınıñ başına kelgen sınav ve accılarnı yeñmek içün küç berilsin, qanunsız mahkeme esnasları toqtatılsın ve qabaatsız qırımtatarlar azatlıqqa çıqıp, qorantalarını bahtlı etsin», dep aytıldı.

Zampira Asanova qırımtatar milliy areketine 1960-ıncı yıllarnıñ ortalarında qoşuldı. 1969 senesi iyün 6-da Moskvada Petro Grigorenkoğa qoltutuv şiarları altında numayışlarğa qoşulıp, sürgün etilgen qırımtatarlarnı vatanğa qaytarmağa talap etken edi. Qırım ve qırımtatar halqınıñ cemaat-siyasiy yaşayışında faal iştirak etti. 2014 senesi yanvar 17-de vefat etti.

Yanvar 16-da Qırımda «Çiygoz davasınıñ» mahkeme oturışları ğayrıdan başladı.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Rus Birligi» firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.

Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

Qırım «mahkemesi» Çiygoznı aprel 8-ne qadar apiste qaldırmağa qarar alğan edi.


XS
SM
MD
LG