Link açıqlığı

Yaltalı «Hizb ut-Tahrir davasınıñ» mabusı Refat Alimov SİZOda yaramadı – faal


Yaltalı «Hizb ut-Tahrir davasınıñ» mabusı Refat Alimov SİZOda soñki aftalar içinde üçünci kere büyrek hastalığından yaramadı, dep bildirdi Facebookta yanvar 17-de «Qırım birdemligi» birleşmesiniñ faali Anna Bogaçeva SİZOğa barıp kelgen advokatnıñ aytqanlarına esaslanıp.

«Ekimlerni çağırdılar, birden kelmediler, ine yaptılar. Refat daa beter oldı: ağrıdan yerge yattı, yürek bulantuvı oldı. Ekim tekrar çağırılğanda kene birden kelmegen, soñra ise Refat ağrı olğanını uydura, dep ayttı. Kamerada yatqan diger mabuslar onı tibbiy bölükke alıp ketmege talap ettiler, bunı yaptılar. Anda ağrı kesici berildi, Refat özüne keldi. Onı er kün ağrı çekiştire», – dep aytıla haberde.

Kreml kontrol etken Aqmescitniñ Kiyev rayon mahkemesi Yaltalı «Hizb ut-Tahrir davasınıñ» mabusları Emir-Üsein Kuku ve Refat Alimovnıñ apis cezasını 2017 senesi fevral 8 kününe qadar uzatqan edi.

«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.

Uquq qorçalayıcılar apiske alınğan Yalta sakinlerini siyasiy mabus olaraq tanıy.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.



XS
SM
MD
LG