Ukraina İçki işler naziri Arsen Avakov, 2017 senesi içün ukrain silâlı quvetleriniñ esas vazifesi olaraq Donbassta suverinitetniñ pekitilmesi ve işğal etilgen Qırım üzerinde kontrolniñ qaytarılmasını belgiledi. Bunı Ukraina İİN matbuat hızmeti yanvar 17 künü bildirdi.
«2017 senesi Donbasta Ukrainanıñ halqara seviyede tanılğan sıñırlarına çıqmaq vazifesi qoyulacaq, soñra ise – Qırımda da. Bu ceryannen politsiya, gvardiya, adliye organları meşğul olacaq, lâkin birinci – sıñırcılar yollanılacaq», – dep bayan etti Avakov.
Ukrain naziriniñ sözlerine köre, bu – uzun müddetli missiya degil de, yaqın vaqıtnıñ vazifesi.
«Plan azırlanılıp, vazifeler berilgen soñ eki afta devamında devlet sıñı üzerinde köntrol elge alınmaq kerek», – dep qoştı Avakov.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
